Вардар загуби во Барселона, но остануваме на првото место на табелата

По 15 натпревари на Вардар без пораз во лигата на шампионите Барселона успеа да ги освои трите бода на средбата од лигата на шампионите. Шпанскиот тим победи со 29-28, но и покрај тоа „црвено-црните" остануваат на првото место на табелата во А групата во лигата на шампионите.

Имавме дури и шанса во последната минута да се надеваме на реми, но судиите предолго го толерираа неактивниот напад на домаќините. Триумфот или бод можеше да ни донесе уште помирна завршница и побрза заверка на првото место и директниот пласман во четврт-финалето на ЛШ. И сега сѐ е во наши раце, ние сме прво место имаме предност од еден бод во однос на Нант, и уште три натпревари за играње.

До крајот на натпреварите од групната фаза Вардар игра дома со ПИК Сегед, потоа гостува кај Нант и на крајот е домаќин на Висла Плоцк. Секој натпревар е важен, и секој бод ни носи поголема шанса за директно четврт-финале.

Во второто полувреме му дозволивме на шпанскиот тим лесно да ги казнува нашите грешки, па и кога ја губевме топката од контра реализираа. Ние потешко се снаоѓавме на нивната позициона одбрана, која на моменти беше и поагресивна од нормалното. Разликата од 3-4 гола во корист на домашните во самата завршница се стопи, но веќе немаше време за целосен пресврт.

Ова беше 14. натпревар на Вардар и Барселона во ЛШ, и продолжува традицијата тимот од Шпанија на домашен терен да победува.
Го имавме и Арпад Штербик на голот со 14 интервенции, но противничкиот голман Перез де Варгас имаше три помалку, но повеќе во клучните моменти.

Барселона - Вардар 29-28 (15-14)
Штербик, Милиќ, Криштопанс 7, Циндриќ 5, Борозан 4, Дибиров 3, Шишкарев 3, Карачиќ 2, Кањељас 1, Мораеш 1, Македа 1, Стоилов 1, Абутовиќ, Чупиќ, Марсениќ, Војводиќ

 

сабота, 10 февруари 2018 - 20:18