Самсоненко: Со сѐ што сторивме го заслужуваме Ф4

Вардар веќе влезе во историјата на македонскиот ракомет како прв тим што трипати триумфирал во регионалната СЕХА лига, и четири сезони е меѓу осумте најдобри тимови во Европа. Годинава „црвено-црните" го прескокнаа и осмина-финалето, бидејќи во групната фаза го освоивме првото место, што досега не му успеало на ниту еден македонски тим.

Сега преостанува да се направи чекорот што сите желно го посакуваат и се надеваат дека ќе стане реалност - пласман меѓу четирите најдобри екипи, и играње на завршниот турнир од ЛШ. Наш противник е германски Флензбург, истиот тим со кој и почна нашето издигнување на европските височини. Во 2014 година еден гол не делеше од пласман на Ф4. Сега сме и помудри, и позрели и поискусни. Имаме уште подобра екипа, и резултатите што ги постигнувавме ни даваат за право да се надеваме на остварување на она што ни недостасува.

Претседателот на Вардар, Сергеј Самоненко заедно со екипата и навивачите живее за овој резултат. На прес-конференцијата пред заминувањето на тимот за Германија, како и секогаш имаше и емотивно обраќање.

„Сакам да им се заблагодарам за присуството на Живко Мукаетов, претседател на РФМ, Филип Милошевски, генерален секретар на РФМ и Михајло Михајловски претседател на СЕХА лигата. Денеска беа поканети и Драган Начевски, како претседател на судиската комисија во ЕХФ и Марјан Начевски, како комесар на СЕХА лига.

Ние четврта година по ред влегуваме на четврт-финале и за нас е многу важно зашто четири години се бориме на спортските терен и надвор од него со една цел да влеземе на Ф4 турнирот во ЛШ. Имаше и добри и лоши моменти во нашата екипа, но ние секогаш имаме една цел - пласман на Ф4 турнирот.

Како што пред мене спомна спортскиот директор Едуард Кокшаров, имаме лоши информации, но, не сакам да зборувам за тоа во детали и без разлика што ќе се случи ние ќе дадеме сè од себе да го поминеме Флензбург.

Сакам да поставам едно прашање пред јавноста „Дали го заслуживме ова". Јас мислам дека ние со сѐ што сторивме го заслуживме ова. Не само во однос на инвестиции во првите екипи, туку и со развој и поставување на инфраструктура, младинските школи и иднината на македонскиот ракомет. Вложена е многу сила и енергија во детските школи и младинските категории.

Нашиот конкурент Металург е на истиот пат и добро работи. Кога дојдов тука не сакав да зборувам за натпреварот со Металург, но ова беше последната капка зашто не заслуживме таков однос. Во цела сезона загубивме четири натпревари во ЛШ и еден во СЕХА лигата, а по натпреварот со Металург секаде во јавност пишуваше дека играчите на Вардар играле без срце. Како може со единствениот ривал во македонското првенство да се каже дека играле без срце. Лесно е да се фалиш со тактика седум на шест кога на секое пробивање на пивот е досуден пенал, или во најмала рака 9 метри. Имавме 9 седмерци. Извинете што ова го спомнав, не сакав денес за ова да зборувам иако сакав емотивно да реагирам со соопштение по овој натпревар, но размислив и се премислив.

Како што спомнав имаме не баш добри информации во однос на делегираните судии. Не ми е јасно зошто ни ги ставија нашите „пријатели" од Данска кои ни го судеа последниот меч против Барселона, кога целата екипа, спонзорите и останати работници на Флензбург се Данци.

Но, веројатно така одредила Европската федерација и ние треба да почитуваме, но се надеваме дека од Флензбург и ЕХФ ќе го пратат овој натпревар и ќе гледаат сѐ да биде како што треба и да не се повтори тоа што се случи пред три години. Ако се повтори истата ситуација со нашиот клуб јас ќе се повлечам од ракометот, веќе немам сила да се борам, ќе останам во Вардар, но ќе се посветам на младите категории и ќе развиваме уште школи.
Но, да ни се случува тоа што се случува, и да инвестирам секоја година по 7 милиони евра во ракометни клубови, повеќе не можам и сакам да ги повикам сите Македонци да имаме поддршка и во Флензбург, на гостување, и во Македонија.

Ќе се потрудиме да има пренос од натпреварите, по можност и од натпреварот во Скопје и во другите градови, како и по можност на плоштадот во главниот град зашто очекувам голем интерес, а нема да има простор за сите во салата.

Барам поддршка од Федерација, од претсредателот и раководствата, и од Михајло Михајловски, претседателот на СЕХА лига, човек кој повеќе од мене е заслужен за Вардар. Исто вложил многу пари, но не е сѐ во парите. После секој пораз и секоја неправда, лежам два –три дена дома со нарушено здравје зашто сериозно ја преживувам секоја неправда.

Затоа ние треба да се сплотиме сите, да дадеме поддршка на нашиот клуб. Разговаравме со стручниот штаб и со тренерите дека треба да дадеме сè од себе без разлика на тоа што ќе се случува таму, завши претседателот на РК Вардар, Сергеј Самсоненко.

Првиот натпревар меѓу Вардар и Флензбург се игра на 22 април во Германија, а реваншот е на 27 април во Скопје.

 

среда, 19 април 2017 - 14:53