Бисинов Вардар првиот ден на турнирот во Белград го заврши со една победа

Членовите на Ракометната академија Вардар, момчињата од ракометната школа Бисинов Вардар по првиот ден на меѓународниот турнир „Трофеј на Белград" славеа победа против екипата на Земун. На вториот натпревар против екипата на Јадран Хрпелје од Словенија Бисинов Вардар останаа без победничките бодови.

Денес во 14:35 Бисинов Вардар играат против екипата на Студентски град од Белград, а утре во 9:35 играат против Кочевје од Словенија.

На натпреварот со екипата на Земун, Бисинов Вардар одиграа тежок, но изедначен натпревар и успеаја да слават победа со 15 : 14.

Натпреварот против Јадран Хрпелје момчињата од Велес го изгубија на крајот на мечот. Во текот на натпреварот имаа постојана предност, а и на пауза заминаа со предност од 11 : 9. Сепак во крајните минути среќата им се промени и словенечката екипа победи до 18 : 20.

Екипата на Бисинов Вардар се натпреварува во категоријата родени 2005 година, а составена е главно од момчиња родени 2006/07, кои се натпреваруваат и во нашата Вардар Јуниор лига, и три момчиња родени 2005 година со кои ја балансираат разликата во возраста против постарата конкуренција.

сабота, 28 декември 2019 - 12:39